Ek wens ek kon:

• jou kadawer opgrawe en die pulwer
  afstof soos ’n ornament uit ’n kis
• alchemis speel; êrens die elixir steel
  en jou verdorde bloed daarmee kwik
• jou vleis uitbou met klei en jou vel
  met sag gespinde sy span
• bolletjies see in my hand rol totdat dit jel
  en dit versigtig in jou oogholtes rol
• sewe kraaie se blinkste vere pluk;
  jou mooie hare terug rangskik
• ’n skulp se suis en ’n altviool se kwê
  saam fynmaak en in jou keel inlê
• asem jou droeë-koraal longe in soen
  tot jy eens pienk in die wange bloem
• sonder aankondiging jou by die hand gryp,
  strand toe hardloop en kaalvoet trou
  [maar ek kan nie,
  en dis nie lekker nie]

 

.... Sanko Lewis